अशें कित्याक केलें?
ते म्हयन्याचे पांच दीस
तिचे अशे कित्याक गेले?
कित्याक शरिराचे ते त्रास सोंसून
कोनशाक वचून पडले?
कित्याक पोटाची ती भूक सोडून
जनावरां सारकें भोगले?
कित्याक दिसांचें तें सपन सोडून
त्याच हांतरुणार उरले?
कित्याक नवे-नवे कपडे सोडून
अमकेच कपडे घातले?
कित्याक रांदचेकुडींत वच्चे सोडून
दुसर्यान वाडिल्ले खाल्ले?
कित्याक पुजलेल्या देवा कडल्यान
इतके तिका पयस केले?
आदार तिका दिवचो सोडून
भश्टे कित्याक मानले?
कित्याक सदांचेच ते हात सोडून
इतले परके केले?
एका फाटल्यान एक येवन
भराभर प्रस्न सुचले,
तिच्या हातांत इतलें व्हडलें
कितें तरी घडलें?
कवी - वैष्णवी सुभाष साळगांवकार
सरकारी कला, विज्ञान आनी वाणिज्य महाविद्यालय, सांखळी, गोंय.
👌
ReplyDelete👏
ReplyDelete