आफड
कवी - अविनाश नायक
म्हजे मासीक पाळयेच्या वेळार
म्हाका आफड आसा अशें म्हणून
म्हाका अशुद्ध समजून हिणसावपी
तुजे मतीर चडलेली अडाणीपणाची
चरबी जिरोवपा खातीर ती आफड
तुका येवपाक जाय आशिल्ली!
तुज्या समाजांतल्या वांज, परत्या पांयाचे,
अपशकुनी ह्या उतरांच्या काळजांतली वेदना
कळपा खातीर,
गर्भाशयाचे गादयेर गर्भ सांबाळटाना
जावपी त्रास सोंसपा खातीर,
भगवो, पाचवो निळो ह्या रंगान लोळपी तुका
तांबड्या रंगाचो भंय कळपा खातीर ती आफड
तुका येवपाक जाय आशिल्ली!
काळे पिशवीन नुस्त्याच्या जाग्यार लिपोवन
सॅनिटरी नॅपकिन घरांत येवपा खातीर,
बायलांचेर हिंसेन गालार पडपी हात
मायेन मात्यार फिरपा खातीर,
घराण्याक वंशाचो दिवो नाका पणटी जाय
हीं उतरां आयकपा खातीर ती आफड
तुका येवपाक जाय आशिल्ली!
तुज्या मंदबुद्धीचो वापर करून पळय
सादे नासता जल्म दिवप आनी जगप,
जर तर सोड आनी तूं हें मान्य कर,
विश्व निर्मितीचें काम तुज्या लागीं जमपा ना
म्हणजे तुजी लायकी ना म्हण देवान हें
काम म्हाका दिलां,
तूं जगता तुज्या घमेंडान आनी अभिमानान
म्हाका जगपाक दी म्हज्या हक्कान आनी
सन्मानान!
Comments
Post a Comment