म्हयन्याचे मोजके पांच दीस
तिच्या खातीर इतके त्राशीक
कित्याक आसतात काय?
स्वताचें घर आसून
लेगीत एकटीच कोनशा कुडीन
कित्याक तळमळटा काय?
जंय-जंय घरांत पावलां
लागता थंय-थंय तिका
शेणाचो शिताडो कित्याक
घालचो पडटा काय?
ती हांतरुणार
वळवळटा तरी लेगीत,
तिची तळमळ कोणाक
कित्याक दिसना काय?
रांदचेकुडींतलीं चांदी-तांब्याचीं चकचकीत आयदनां
सोडून खेरीत पत्रावळीर
कित्याक जेवचें पडटा काय?
मासीक पाळयेक समाज
दोशी कित्याक थारयतात
बायलेक कोनशाक बसोवन जग
कसली खोशी मनयता काय?
दरेक मनशाची जात वेगळी
कात वेगळी तरीय....
मासीक पाळयेचो समज मात
तोच्च आनी तसोच.....
अंधश्रद्धेंत गुर्फटिल्लो...
हाका जबाबदार कोण काय?
ती स्त्री काय तिचें लिपिल्लें अस्तित्व?
मासीक पाळयेक आनी ते स्त्रीयेक
दरेकल्याचो आदार जाय...
अंधश्रद्धेंत गुर्फटिल्ल्या समाजाक
एक नवी नदर लाभपाक जाय.....
मासीक पाळयेक दर अस्तुरेन
मुक्तपणान जगपाक जाय....
करिश्मा ताटे
सरकारी कला, विज्ञान आनी वाणिज्य म्हाविद्यालय सांखळी गोंय
Comments
Post a Comment